Tummaso Aniello

Masaniello

Quanno me trovo cu na penna mmano

e ‘o pane ‘un m’interessa, c’ormaie è tarde

provo pur'io a fà ‘o Masaniello,

chillo ca facette nu casino ‘o sette ‘e luglio

e arrevutaie Napule pe nu mandarino

che le fuiette ‘e mano acciaccanno

nu surdato, povero comme a isso

ca s’arrangiava, p’apparà ‘a jurnata,

arravuglianno ‘a paglià e’ na fumata.

Chello ca saccio è ca murette ‘mpiso.

Era pesante ‘a gabbella ‘e allora,

pesante cchiù ‘e ogge e tanta muorte ‘e famma

piglijieno curagge pe fà onore

a chello ca Tummaso steva ‘a fà

pure si ‘a doppo n’ora comme ‘e mosche

muretteno accise scamazzate.

Nun era comme ogge,

ch’è  n’ata confusione,

ca tra ‘o giurnale e ‘a televisione

‘a verita ‘n ‘a sape maie nisciuno.

Doppo mez’ora ‘e maccarune cuotte

nun se sentette addore cchiù 'e niente.

Però chi se futtete ‘e meliune

‘o sanno tutte quanto ma nu nomme

c’ addeventaie nu santo ‘un se po’ dicere,

nisciuno t’’o cunferma. Vengo a sape ‘a ll’ate

chello ca io nun saccio ‘e me.

Tengo na voglia ‘e dicere ca io songo ‘nnucente

e no ‘o cchiù fetente ‘e tutte quante,

ca qualche ghiuorne me farranno ‘a festa

chella ca fanno a chille comme a me.

Chi è senza peccato aize ‘a mano,

ma ‘o cchiù fesso se ne stesse zitto

si no ‘o fanno ‘o quarantuno bis.

E chi se l’allicordo? Cchiù nisciuno,

comme a Tummaso fesso e puveriello

ca doppo duie minuto ascette ‘e cereviello.

Gioacchino Ruocco

Ostia Lido              02.07.016