C’avite scritto ‘e nuovo, ‘on Salvatò ?

Immagine di Cinzia Ruocco Miceli

C’avite scritto ‘e nuovo, ‘on Salvatò

a quanno state ‘ncielo, all’atu munno ?

Si staie assieme a Ddio, ‘mparaviso

che poesie può scrivere ?

E’ Isso ca fa tutte cose ccà,

ca si me lassa fà a me qualcosa

nun saccio manch’io c’aggia fà.

Me so’ purtato appriesso a nustalgià

ma nun ‘o pozzo cunfessà a nisciuno

si no me tocca n’anno ‘e Purgatorio.

Era de maggio, quann’era ‘o tiempo mio,

e “a schiocche a schiocche, li ccerase rosse”

cadeano ‘nzino a nenna mia

c’ancora me vo’ bbene, e nun me passa

ma ccà ‘e stagione ce n’è sola una,

ma ‘e maggio io no, nun me ne scordo

e si me l’allicordo sottovoce

me tocca ‘e murmirià tutt’’a canzone.

Fresca era ll’aria e la canzone doce.

Era d’aprile quanno ve lassaie

e ‘o sole ccà ca nun me lassa maie

me sta ‘mbruglianno ‘o core e ogne ricordo.

D’ammore, oj ni, io mò io che ne faccio

si Ddio me tene d’uocchie ogne minuto.

Si  nun ‘o guardo, isso me vene ‘e faccia

Mentr’ io le surrido a uocchio a uocchio

primmo ca faccio ‘o ‘nguacchio e se n’accorge.

Si fosse ca me desse sulo ll’uorge

Io m’’o pigliasse p’essere cuntento,

ma ccà, oj ni, ca nun s’azzecca niente.

Ognuno tene ‘o suie ed è cuntento.

Era de maggio e si ca m’allicordo

ma stu ricordo ccà nun dura eterno.

Sto ‘ncopp’a lista c’aggio cagnà natura

ca si rinasco songo nu pezzente.

ma si ritorno a Napule può sta sicuro

ca vengo tuorno tuorno a te cercà.

Sta vota sarragg’io a te cantà

“si sta ferita ‘e ammore” nun se sana

ca ‘ncoppo nun me fanno cchiù turnà.

Gioacchino Ruocco

Ostia Lido                   01.07.016