Piazza Municipio

Castellammare di Stabia - Piazza Municipio

Quant’anne so’ passate ‘a chillu juorno ?

Tante ne so’ passate, proprio tante,

ma se v’’e ddico nun me piaglio scuorno.

Turnavo a casa doppo na cammenata.

Sicuramente mamma me chiagneva.

Ereno passate cchiù ‘e doie ore,

ma io d’’o tiempo nun me ne ‘mpurtavo.

Me ne scurdavo troppo facilmente.

Chillu juorno vulevo vedè ‘o mare

pecchè ‘a Scanzano proprio ‘un se vedeva.

‘O viento ca passava dint’’o vico

parlava d’’a muntagna aret’a casa.

e asciuttava ‘e panne ch’ereno stise.

Quatte pezze ‘e vvote e doje cammise

cu ‘e puze arrepezzata p’’a fatica.

Quanno ‘o vedette ‘o mare rummanette

c’’o core appiso a 'e suspire perze

che m’ero fatto quanno stevo a Torre

ch’era duje passe a doppo ‘a mariggiata

c’ave purtata ‘a rena nn’ante ‘e ccasa

fino addò ‘e canne steveno attestate.

C’’o maletiempo t’’o sentivo ‘nganno

e ‘a dint’’o pietto se piagliava core

pe n’’o purtà luntano fore mano.

Quanta varchette c’avevo miso a mmare !

Fatte cu ‘e cucuzzelle date‘e puorche

nun ’arrevava una a Marechiaro.

E s’acchiappava sicuro Ruvigliano

pecchè ’a sera asceva  na currenta

c’arravugliava l’onne mannannele ‘o cuntrario.

Sentevo addore ‘e terra, addore ‘e mare

e ‘o core se sparteva sempe cchiù chiaro

penzanno ‘a vita ca vulevo fà.

Gioacchino Ruocco

10.04.016