Pure na gatta

Pure na gatta pare ca sciascea

quanno fa ammore

‘ncopp’’o muro ‘e casa.

So’ tanta sera

ca ‘o va currenno appriesso

ca pare na preiera  ‘o mmiaulà.

Pare c’attuorno nun ce stanno gatte,

sulo muscille ca jocheno c’o gliummero.

Pure ‘e suricille so’ tranquille

c’arriveno d’’o bosco p’’o casillo.

‘A luna ‘ncielo è l’uneca astiosa,

c’’a faccia fredda ancora d’’a vernata.

Vulesse fa l’ammore

ma ‘o sole nun ce sta

già s’e cuccato.

Appena ‘e luce luce stanno fora

se ‘nquarta e s’annasconne

arete ‘e nnuvule

ca nun manchene maie

dint’a sti notte.

CChiù tarde ‘nt’’o ciardino è lotta ‘e guappe

e ‘a gatta aspettà comm’una ca se prea

ca pe ll’ammore suie

fanno a zumpata.

‘O meglio sarà chillo

c’’a fa sceppà ‘e capille

quanno faranno ammore

a core a core

facennela gnaulà
pe n'ora ancora.

Gioacchino Ruocco

Ostia Lido                    23.04.016



Nota:
La gatta quando va in calore smette di mangiare, si rotola continuamente per terra, strofina il collo e la testa contro ogni oggetto accessibile, emette miagolii strazianti quanto quelli di un neonato, in genere di dimostra più affettuosa verso i proprietari, raramente diventa aggressiva e reagisce alle carezze del proprietario sospendendo l'atto di strusciamento , assumendo una posizione a sfinge con il collo esteso, il bacino sollevato, il dorso inarcato e spostando la coda per dimostrare disponibilità all'accoppiamento.