'A parentela. (Botta e risposta)

Botta

Quanno ce ‘ncuntrammo

me dice sempe ca simmo pariente

e nun te nego maje nu cafè

si no ‘a ggente me vene a ddì

ca songo interessato pure si dongo

e ‘un aggio maje avuto  niente ‘a te.

Ma tu quanno m’’o faie nu presente ?

Quanno m’abbraccia na vota cu piacere

‘e me vedè doppo tantu tiempo,

‘e vvote pure n’anno ?

Ma che parente si ? Parente ‘ e riente

ca s’appresenta quanno tira ‘o viento

e ‘e ccose ‘un vanno bbone…

o nu parente ca uno trova sempe

pe nu male ‘e capa, pe ddoje parole,

pe parlà d’’e frate, d’’e nonne

d’’e piccerille o ‘e quanno nuije

jìevemo a papiscio uno cu n’ato ?

Eremo frate e mò parimmo estranje.

E’ overo ‘a vicinanza fa cchiù sangue

e ‘a luntananza fa scurdà c’’o tiempo

pure ‘e ccose cchiù belle, ‘e sentimiente.

Quanno te guardo io te tengo mente

pe m’arricurdà ‘e chi si figlio,

ma chistu core ‘e vvote nun te piglia

cchiù p’’a mano comme a quan’ire piccerillo

pecchè si overamente fusse frate

t’avisse arricurdate qualche vote

ca purio aggio bisogno ‘e te

e ce piglià chillu cafè assieme

ca maje na vota tu è pavato a me.

Risposta

‘O faccio pe rispetto,

no pe ‘nteresse.

‘E vvote vaco ‘e presse

e tu me vire

cu ll’uocchie nire

ca me porta appriesso

pecchè ‘a nuttata

è gghiuta malamente.

Chillu fetente ‘e figliemo,

tuo nipote,

s’è arretirato sulo stammatina,

mentr’io ascevo.

Che va facenno ?

Sta appriesso a na vunnella !

E’ scemunuto, un ‘o capisco cchiù.

E l’aggio pure ditto spusatella

c’almeno state assieme

tutt’’o juorno.

Saje c’’a risposto ?

Papà me mette scuorno.

Io nun fatico,

che faccio ‘o mantenuto ?

Ma c’aggia mantenè n’ata famiglia?

E chi me piglia a me ?

Tengo tre figlie,

spartuto a tantu tiempo.

Dice ca so curnuto.

Pozz’essere scuntento ?

Nun me ne fotte niente

comme a tant’ata ggente.

Gioacchino Ruocco

Ostia Lido  28.02.016