A ssorde nun ce sente, songo surdo

Doppo na jurnata ‘e accidemiente,

jastemme ca cchiu nnere ‘un ce ne stanna

turnanno ‘’a casa trovo duje vrachiere

cu na pistola mmano: - ‘A bborza  o ‘a vita.

Si ‘a te te serve ‘a vita, nun  ‘a tengo

E manco ‘o cacciavite. Faccio nu mestiere

ca te regno ‘a capa ‘e chiacchiere ch’è nu

piacere. Te conto mò stu fatto…

Chillo me guarda: - Ma fusse scemo tu.

Te cride ca sunammo ‘o putipù.

Tu ce jà dà ‘e sorde.  E io so’ surde.

T’’ sto dicenno, ma  ‘n ‘o vuò capì !

Ma tu che vuò ‘a me. Nun tengo niente

Dint’a sti sacche, ‘o vvì , ce passa ‘o viento.

Chiedo qualcosa ‘a ggente quanno passa

E tu m’‘e chiede a me. Ma fatte arrassa.

Va be’ ch’è vierne, ma tiene ‘a capa fresca.

Troppo arrefrisco farranno male ‘e chiocche.

Si aiza ‘a mano, ‘a vida chesta nocca

comma a na mazza ‘e fierro t’’a do ‘mmocca.

Stateve bbuone. Si nun tenite chiocche

ve manco pure ‘a forza p’arrubbà.

Va bbuone ca so’ nu San Giacchino

ma si nun fuje n’asteco ‘int’’e rine

e chi t’’o leva. Sti duje cretine

t’escene a nnanze p’arrunà duie sorde.

E ‘e vonno proprio ‘a me, figlio ‘e mappine,

ca si me parle ‘e sorde songo ‘o cchiù surdo.

Gioacchino Ruocco

Ostia Lido                          14.02.2016