Comme si fosse

Comme si fosse…

Da "Suspire 'e miezo juorno" di G. Ruocco

G. Ruocco - Donna al sole - H cm 30 - Tufo romano - 1985

Comme si fosse…

Comme si fosse farina pe fa ‘o ppane

sta femmena me ‘mpaste tutt’’e juorne,

m’accarezza e m’astregna dint’’e mmane

pe me fa crescere comme si fosse ‘mpasto.

Sape c’aggio bisogno ‘e essa e n’apprufitta

e ‘ncoppo’’o chiano me stenno c’’o penziero

d’’a pizza ca s’aspetta c’addivento

sapurita e tennera sott’’e diente

o na sfoglia pe fa na pasta frolla

carreche ‘e marmellata ‘e mandarine,

‘e frutta c’’a pigliata ‘a int’’o ciardino

quann’era ‘o tiempo ch’era cchiù ammatura.

Comme si fosse ancora na criatura

me piglia pe na mano e m’accumpagna

dint’’a nu ruoto ‘nzieme ‘e mulignane

pe fa na parmigiana speciale.

Me stenne ‘e vvote e me fa cchiù suttile

e po m’assoccia comme a  tagliatelle

e me strascine dint’a na tiella c’’o zuco

e dduie cucchiare ‘e pummarole.

Ma ‘e vvote quanno stanco me n’aesco

pe piglià sciato ‘a tutta st’ammuina

m’astregna cu penziere ‘e gelusia

dint’a nu panno fino a ca nun servo.

Ma pe fa n’ommo nun basta sulo chesto

ce vo’ ‘a fantasia e ‘o core tanto

ca si sbaglie ‘o raù comme a nu santo

è pronte a te guardà cchiù ‘nnammurato.

Na pizza ca nun va nun è nu guaie!

T’’a mangie ‘o stesso comme a nu biscotto

e si nu journo na cosa te va storta

nun è succieso mica ‘o quarantotto.

Stienne ca stienne se fa troppo fino

pure nu quintale sì è farina,

ma si riesce ‘o mpasto quanno cresce

nun t’allargà e nun fa ‘a culumbrina.

Gioacchino Ruocco


Ostia Lido, 26 aprile 2012

Inserita nella raccolta "Suspire 'e miezojuorno"

di Gioacchino Ruocco  pubblicata sul Blog Ruocco Tribù