Quanno me guarde

Arrefriscannemo  ‘o core

te si pigliata ll’anema

senza ca na parola

ascesse  a  vocca a te.

Quanno me guarde

i’ veco ‘o paraviso ‘nnante a me

e nun ce stanno scuse

pe cagnà via.

Me guarde e m’arrefrisco.

Me pare ‘ncopp’’o bbosco

cu ll’evera ‘a cchiù fresca

sotto a sti piere mije.

Aiere fuje

na jurnata ‘e maraviglie.

Sentevo arille

cantarme ‘mpietto n’ata vota

e pure nu dispietto

me faceva ridere e cantà.

Nu  sguardo tuio me ‘ncantava

comme a ll’acqua fresca d’’a funtana.

Nu tuocco ‘e mano

e me ne jevo ‘nzuocolo

comme a na palomma

ca va a nu sciore a n’ato

facenno na pazzia ‘e vularelle.

‘A marennella cu te

è stata nu ricordo ‘e guagliuncielle

quanno assaggiavo ‘o tuojo

e tu ‘o mmio

sempe d’accordo,

sempe e cosi sia,

redenno e pazzianno,

currenno e secutanno

fino a ca ll’aria

nun cagnava faccia.

E mò che faccio

quanno tu cagne via ?

Te scrivo na poesia ?

Ma che ne faccio

si so’ nu straccio

ca ‘un s’arrepezza cchiù ?

Campo ‘e ricorde,

ma t’arricuorde ‘e me ?

M’allora era nu suonno

o fantasia ?

Ancora ‘a vita mia nun sape niente:

che r’è nu male ‘e riente

o nu dulore ‘e capa !

Pecchè si t’è pigliata tutte cose,

mò me pogneno ‘e rrose

e me fa male ‘o core ?

Forse sarrà 'o juorno ca io moro...

Gioacchino Ruocco

Ostia Lido                  09/02/2016