Quanno na jurnata...

 Quanno na jurnata addà jì storta

accummencia d’’a matina ‘a cagnà ll’aria.

Guardo stu cielo pare ca è già muorto,

ca se n’’o sta purtanno Bellumunno.

‘O sole tunno e pallido

 nun dice c’ora è

e chello ca me pare

nun me dà pace all’anema.

‘A capa me fa male

 e ‘o core nun afferrà

si è gghiuorno ‘e pace o guerra,

si ‘a terra adda tremmà

primma ‘e sta sera.

A essere sincero,

nun me ne ‘mporta ‘e niente.

Tanto addò curre curre

si t’addà afferra t’afferra

‘a malasciorta o ‘a bbona.

‘O viento nzerra ‘e pporta,

ma po’ t’’o truove ‘o stesso dint’’a casa.

Le basta qualche senga.

te mette ‘o friddo ‘ncuollo

ca vene voglia ‘e lietto.

Ogge che faccio ?

Stracquo  comme fa ‘o mare

o attracco ‘a varca ‘o muolo ?

Intanto dint’’o cielo

nun c’è nu vuolo d’angelo.

Chest’aria sape ‘e pepe!

Fa fa sule starnute.

e chi risponne dicennte: -Salute,

me pare ‘e n’atu munno,

forse ‘e ll’atriere.

Passo d’’o pasticciere,

piglio ddoje pastarelle

e me ne torno a casa.

Ce vò na bella cosa,

ogge n’aggio bisogno.

‘O munno po’ m’’o sonno.

Dimane cagna posa.

Gioacchino Ruocco

Ostia Lido                     16.02.2016