Parlanne ‘e maccarune…

Parlanne ‘e maccarune

me so’ perzo ‘int’’o raù,

no chillo ca faie tu

e manco chillo ‘e mammete

ca nun ricorde cchiù.

Tu nun t’è morta ‘e famma

maie na vota,

ma po’ chi more ‘e famma ?

Gira che gira ‘o stommaco

s’appare quase sempe,

e sulo si s’arrenne

ce ne vò ‘e tiempo pe muri.

Si curamente

te fanno qualche flebo,

ma ‘e nu piatto ‘e zite

te si scurdata e basta.

‘A pasta si nun mbuttunata

tu nun te miette a tavula.

Tu vaie truvanno ‘a fravula,

‘o melunciello janco

‘e ppere juste ammature

pecche qualcosa ‘e duro

Sulo nu miraculo ce vò

pe t’’o mmuccà.

N’aggio spezzato zite

tanto ch’’e ddete

me fanno ancora male.

Io ero chillu cchiù gruosso

pirciò tuccava a me.

Isso c’’o zuco ncoppa

faceva sempe ‘o re.

Ce stanno n’ati dduje,

chi ‘e vò: - A me,  a me.

Ma io nun rispunnevo

ca già penzavo a te.

Gioacchino Ruocco

Ostia Lido                       17/02/016