Dint’’o bastardiello

Dint’’o bastardiello

ce stanno scritto ‘e nomme

‘e tanta guagliuncielle.

‘O tujo nun l’ggio maie truvato.

‘O tenarraie nu pate, na famiglia

o si ‘e chi te piglia piglia

e passe mano ogne mez’ora

quann’’o core se stanca

e ‘un trova ammore

o ‘a fatica te piglia e te ne porta

tantu luntano

ca pe turnà a casa passeno mise ?

E so’ passato  ‘e mise, è quase n’anno

ca te lavo, te petteno,

te faccio ‘a scrima ‘ncapa,

ca te tengo p’’a mano quanno ascimmo,

ca me guarde e me chiamme

comme a na mamma

chiammene ‘e figlie.

Povera a me ca te pigliaje ‘mbraccio

‘o juorno ca pur’io ero nu straccio

c’’o core fatto a ppiezzo

e me facette scema

tenennete astritto mbraccio a me.

Ma mò ‘e stu calore i’che ne faccio

‘o juorno ca mamma toia arriva

e me te leva a vraccio?

A chi ‘e cconte chisti chiante mie ?

Addò me n’aggia jì pe nun pensarte ?

Parte pur’io e  me me ne vaco addò ?

A chi ‘o ddico ca te voglio bbene ?

Chesta è na pena ca me farrà murì!

E vvote rido e chiagne

e me sparagno na mez’ora ‘e pene

pe ll’ogna ca marzo m’ha spaccato.

Me miette dint’’o core tantu bbene

ch’e ppene se ne vanno a una a una.

Stu mese ch’è passato era ‘e trentuno

e quanto ancora, oj ni, n’anna passà

primma ca torna  chi t’ha lasciato ccà

cu ‘a capa fresca ‘e te vulè campà ?

Gioacchino Ruocco

Ostia lido                  05/02/2016

Nota:

bastardiéllo: s.m. - registro 

per atti notarili o di parrocchia.

              bastardello    [ba-star-dèl-lo] n.m.

registro di minute di atti pubblici o privati

Etimologia: ← deriv. di bastardo, perché contenente indicazioni non omogenee