'O viento d''o lungomare

Statte attienta

c''o viento te ne porta.

Cammina cu 'e prete

dint''e sacche.

P''o lungomare

ce ne vò na sporta

e nu vraccio

ca te tene astrenta

ncopp'a nu pietto

ca te regna 'e bbene.

E' inutile ca chiamma aiuto

ca ce sta ggente

ca se perde

appriesso a nu starnuto

e cu na refele 'e viente

le fanno male 'e diente.

Ce vide maie nisciuno 'mmiezo a villa

quanno è gghiurnata 'e viento ?

'A permanente

che s'hanno fatta a fà?

Stanno 'mpusumate

'nnante 'o specchio

pe vedè comme hanna fà

pe nun s''a scuncecà

si hanna ascì

pe nu mutivo o n'ato.

Ha' voglia d''e chiamma,

ma chi te sente.

Pure 'int''a casa

cu nu cappuccio ncapa

aspettano

c''o viento s'è calamato

mentre tu curre e strille

pe sta a mmiez'a villa

e te gudè 'o mare

ca tene mille cumpare

ma po' rummane sulo

quanno so' tempestate.

Tu invece,

comme a na 'nnammurata,

cirche d''o cunzulà

pure si chiamme aiuto

senza te stancà.

Gioacchino Ruocco

Ostia Lido 11/02/2016