Facimmo pace…

Facimmo pace,

ma è pace ‘e duje minute,

pe nu saluto, nu vaso

o na carezza.

Si cade dint’’a rezza

è n’appiccico sicuro.

Me miette  cu ‘e spalle ‘o muro

e comme a nu siluro

me viene ‘ncuollo

cu ‘a tiritera

ch’è sempe ‘a stessa,

c’ormaie saccio a memoria.

‘A storia è ancora chella

e quanno pazziavo ‘nziem’’a Stella

invece ‘e stà cu tte cchiù piccerella

ca ogne gghiuorno

me stive attuorno

p’’a  spuntà cu me.

Ancora vuò sapè

che ce truvavo,

ancora e ancora

vaie parlanno ‘e me

e addumannano ‘ngiro…

Chi s’arricorda ‘ nuie

nun sape c’adda fà

o tene tiempo ‘a perdere

pe te raccuntà.

                                                    E’ passata quasi ‘na vita

e tu ancora pierce.

Quanno me vire

m’abbracce e po’ me strazie.

Pare ‘a Maronna ‘e grazie,

ma a me tu nun ne faie.

M’abbracce, me salute

e po’ cu nu starnuto

m’alluntane ‘a te.

Me guarde

e m’accarizze cu ll’uocchie.

Me tremmeno ‘e denocchie

a chisti sguarde tuoie.

Nun saccio cchiù che simmo

e all’uocchie ‘e ll’ate

nuie c’apparimmo.

All’uocchie mie te perdo

e te ritrovo

ma doppo n’ora, ‘e nnove

te lasso e me ne vaco

pe fa nu giro largo,

piglià nu treno

pe farme chillu viaggio

ca me fa passà arraggia

almeno pe mez’ora

sapenno ca turnanno

te trovo ancora ‘a casa

e allora so dulure

già primmo ca i0 trase.

Gioacchino Ruocco

Ostia Lido                    20.02.016