‘O tiempo nun m’avasta…

‘O tiempo nun m’avasta

pe te tenè cu me

tutta na vita.

Tutto chello ca faie

è sapurito

ca me vene voglia ‘e campà

all’infinito.

Si ddoce, sì carnale, si cuieta,

nun tire prete

manco si ‘o viento

‘e sceppe ‘a terra

pe me fa male.

Chelle ca truove ‘nnanze

‘e miette a pparte

cu n’arte

c’onge ccose

è nu piacere.

E dint’’e mmane toie

me songo miso

pe me scurdà ‘e guaie

‘e tutt’’e juorne

ca si me staie attuorno

so’ cchiù vivo

senza ‘o corrivo

‘e ritruvà arricietto.

Addò ‘nn’’o mette

‘o trovo,

sempe cu ‘e mmane chiene

c’’o bbene è tanto

e cresce tutt’’e juorne.

E tengo ‘ncuollo

na freve ‘e vulè bbene

ca dint’’e vene frie

stu sanghe mio

ch'è na carezza

o tiempo ca se perde

si ‘o vverde ‘e chesti fronne

nun te piglia

comme a na figlia ‘mbraccio,

comme a ll’ammore

ca te regno ‘o core,

comme a nu sciato ‘e cchiù,

comme a n’adduobbeco

ca te leva’a mano

tutt’’e fatiche

ca nun vulisse fà

ma ca continue a fà

pe fà stà bbuono a ll’ata

ca stanno peggi’’e te..

Ostia lido 29 luglio 2011