‘A chiesa ‘e san Nicola

Sta casa pare ‘a chiesia ‘e san Nicola.

Appena trase ce sta ll’acquasantera

pe te sciacquà ‘a vocca quanno parle.

Te guardo attuorno e vide a Giesù Cristo

ca nun sta ‘ncopp’a croce a se fa ‘o scisto,

gire p’’a casa comme a uno ‘e casa

pe  se truvà na nicchia e arrepusarse

addo fermarse  pe nun fa ‘o cannulicchio.

Fredda, cchiù fredda ca nun ce so parola

pe dicere ‘o  friddo ca ce fa.

E’ na semmana ca me fa male a mola

e sto suffrenno ‘e pene ca me dà.

Vaco giranno c’’o cappotto ncuollo,

ma nu lumino nun se po’ allummà

si nun s’appicce ‘nnanzea na maronna

ca prego, prego ma ‘a grazia nun m’’e a fà.

E me so’ miso ncuollo a fiurella ’e duie, tre sante,

uno è farmaciste e n’ata cu ‘e pinze mmana,

ma ‘a museca nun cagna è sempe ‘a stessa.

Si nun te faie fa fesso nun si bbuono:

vaie all’inferno appena jesce ‘e casa.

Sulo ca ‘int’e a chesta casa nun se jesce

Si ‘un è dummeneca p’’a messa.

Songh’io ca me facette fesso

quanno me spusaie anne fa.

Ll’organo ‘nn ‘o sono, servo messa

comme a nu sacrestano ca nun piglia

cchiù ‘a mesata ‘a qualche mese.

Chi prereca ormai tene pretese

ca meglio nun se sta fore ‘e sta casa.

Gioacchino Ruocco

Ostia Lido           05.03.016