Si pe mancanza ‘e tiempo....

Te voglio bbene,

ma pe mancanza ‘e tiempo

t’’o ddico poche vote ‘int’’a jurnata.

Invece tu me dice ca so’ mmise

ca ‘un t’aggio ditto cchiù.

Allora na carezza

nun è vulerte bbene ?

Nu vaso ‘mpont’’o musso che po’ esse ?

‘E friccechilli ca te faccio ‘e vvote ?

E quanno m’annasconno

e faccio:- Buh ?

Te faccio piglià ‘e nierve, chesto è overo,

ma tu me tiene ‘o musso

pe qualche ghiuorno ‘e cchiù,

‘e vvote na semmana !

Quanno te piglio ‘a mano

e po’ m’’a metto nfaccio ?

Quanno me faie senti nu straccio

e io nun dico niente ?

E’ bbene o nun è bene ca te voglio ?

Quanno te sbroglio ‘a matassa ?

Quanno te corre appriesso

e po’ t’abbraccio ?

Me facci’’a barba

pe nun t’arrussà ‘a faccio.

Te voglio bbene ogne minuto.

Cu ‘a salute ca tengo

nun me tiro arreto.

Forse sarrà ca so’ troppo cuieto

 e allento a presa

si faccio nu starnuto.

Nun è na scusa e 'o saie1

E’ p’’a salute toia.

Si nun ‘o faccio a te ca si mugliera

a chi aggia fà ? A na furasterà ?

Gioacchino Ruocco

26.03.016