Fino a ca nun moro…

Io me respero

pecchè so’ disperato.

Tu si felice

pecché nguaie all’ate.

M’’a faie ‘a dint’a ll’uocchie

tutt’’e juorne.

Io te ne caccio

ma tu me viene attuorno.

Nun saie che ne fa

d’’a vita toia.

Ne tiene una,

ma po’ songhe doie.

Una  pe fa ammunia,

n’ata quanno si seria,

quanno t’appiche

cu ‘a miseria

e nun faie patte

maie cu nisciuno.

Avisse fatte affare

‘a tantu tiempo,

ma ogne vote

cagne sentimento

comme ‘o viento

‘e vascia a marina.

Quann’io passo

tu me tiene mente.

Te struie, ma te ne fuie

duie minute doppo.

Vulesse saglì ‘ncoppo,

ma me dice

ca si felice

senza cundizione

e io me faccio na ragione

e me ne torno ‘o vico appriesso

senza Jì ‘e presso

cantanno na canzone

si no ‘o core chiagne

e a chi ‘o conto

ca na guaglione

m’ha ditto ancora no.

Si ‘o cielo ‘ngrogna

mette a riparo.

Frevaro passarà

Comme a ll’ate anne.

Ma songo io

ca invece passo ancora

e nun m’arrenno

fino a ca nun moro.

Gioacchino Ruocco

03.03.016      Ostia Lido