Tremmeno ‘e mmane

Tremmeno ‘e mmane quanno t’accarezzo.

Ducezza pe ducezza io esco pazzo

p’ogne priezza ca m’arriva ‘a te.

Me cellechea ll’aria,

me fa capricce ‘o viento

ca me scumbina ‘e capille

e dint’’e rine ‘e trimmele cchiù doce

comme a voce toia

quanno vuò qualcosa a me.

Cchìù ruffiana ‘e te nun c’è nisciuno,

manco ‘o rau ca faie quanno è festa,

manco ‘o penziero tuio ca me stracoce

‘a quanno te canosco pe tutt’’o ddoce

ca me scioglie ‘o core

quanno l’ammore

ce piglia e ce ne porta

pe scumbinà ‘e juocche ca facimmo.

Armo na vela

e ll’anema le corre appriesso

sempe cchù ‘e presso,

sempe cchiù cannaruta

comme si nun avesse avuto

maie na gioia

e ‘a foia è tanta ‘e vulè campà

ca nun me stanca

e te venì appriesso

pe t’acchiappà

comme  a na palomma ‘o mese aprile

dint’’o ciardino

c’’a sempe guarda ‘o mare.

Gioacchino Ruocco

Ostia           15.03.016