Tantu ffuoco…

Tantu ffuoco l’aveva puosto ‘n cuorpo

ca nun puteva scuncecà  cchiù ‘e ccose

senza fa rammaggio a n’atu core.

Truvarse facce a faccia cu chi more

nun è na bella cose.

Agliutte pe nun chiagnere, pe nun dà

sfogo a ‘o maletiempo ‘e ll’anema

ca vene’ncuorpo e ‘a nu mumento a n’ato

rumpenno a martellina ‘ncopp’a rota

ca gira e te ne porta.

Sagliette fino a ‘ncielo nu penziero

‘e misericordia e chi s’’e scorde ll’uocchie

 ‘e chi le rispunnette dicennele:

-          Aspetta n’atu ppoco, n’atu juorno.

Nun è mumento ancora.

Stuta ‘o ffuoco  ca nun è ancora tiempo.

Ddio nun vò e quanno vene ll’ora

sarrà nu juorno ‘e primmavera chiena

e ‘a terra chiena ‘e sciure se farrà.

Tiene ‘a mugliera prena.

Scaduto ‘o tiempo, vedimmo chello

ca putimmo fa, chello ch’è justo,

ma niente ‘e chello ca ce piacesse ‘e fà.

‘A quann’era  guaglione aspettava

stu juorno ’e maraviglie.

Quante n’aggio passate, quanta vite

aggio cagnato redenno e pazzianno,

quanta penziere ca se so’ fatte rare,

amare certi vvote, certate nire.

Mò so capille janche.

Resate ca nun saccio pecchè rire,

penziere c’’a nu mumento a n’ato

ponno fernì tutta sta jucate

e ancora te guardo e suspire:

comme te si cagnata.

E quanto t’aggio amato ? Nun ‘o saccio.

E quanta primmavere so’ passate.

Mò songo stanco, nu poco scumbinato,

tanta penziere ca nun vanno bbuono,

Ma quanto t’aggio amata.

Gioacchino Ruocco       

Ostia Lido           27.03.016