Speruto ca sto sulo…

Parlanno, parlanno

è già passato n’anno

ca nun tuorne arretto.

C’avesse fa  pe essere…?

Campo comme fanno ll’ate.

Me ne vaco ‘o triato

quanno ne vale ‘a pena,

e quanno nu penziero ‘e te

me vene  faccio duie passe.

Turnanno ‘a casa

si torna ‘o contrabbasso

dint’’o core tanno ‘o lasso

quanno s’aggriccia ‘a pelle

dint’’e spalle e ‘o friddo

me piglia e me dispera.

Tanto nun tengo figlie

ca se ponno scetà

dint’a nuttata.

Addò stò ‘e casa

nisciuno se lamenta.

All’atu munno

chi me po’ sentì ?

Songo rimasto sulo,

m’’a canto e ‘a sono

e chi me vo’ sentì me sente!

Chi se ne mporta ‘e me ?

‘O Pataterno forse

ch’eternamente

me sta sta tenenno d’uocchio

mmiez’a tanta ggente

ca quanno passa ‘a ccà

me tene mente

speruto ca sto sulo

mentr’Isso

nun tene nu mumento

pe s’addurmì nu poco.

Pure quanno murette

‘o terzo juorno quanno se scetaie

pigliaje ‘o cuorpo suoio e se ne jette.

Gioacchino Ruocco

Ostia Lido              31.03.016