‘O pianaforte..

‘O pianaforte ca io nun sono cchiù

e me riporta arreto a cchiù ‘e trent’anne

me parla ancora ‘e chella gioventù

ch’è cchiù ‘e na malatia pe tutte quante.

‘A vita è nu ricordo 'e na speranza,

jurnate ‘e gioia o dulure ‘e panza

specie quanno fanno certi ccose

ca nun vulisse sentere ma ‘e fanno.

Ognuno veste comme le va ‘a genio

chelle ca trova primma dint’armadio

'e quanno ‘a vita l’è venuta a noia

é sule ‘o matto lle riesce ‘e fa.

‘A museca ca dint’a ll’aria gira

nun è  cchiù ‘a stessa ca tu vuò sentì

e ‘ a ggente nun è cchiù comme a na vota

pecchè ‘e notte, oj ni, vonno durmì.

Pe chistu fatto perdette na guagliona

ch’era na poesia tutt’’a jurnata

e che suspire quanno faceva notte,

ma po’ tutte fernette, era na cotta.

Mò ‘o pianaforte ca nun sona cchiù

pur’isso s’è scurdato ogne suspiro

ca io facevo quanno penzavo a n’ata,

canzone ca nisciuno ha maie cantato.

E vvote tocco ‘e taste e m’accarezzo

e ’o core me fa ancora na priezza

e sotto voce canto nu mutivo

ca nn’aggio scritto ancora pe currivo.

Gioacchino Ruocco

Ostia Lido 29/01/2013

Inserita nella raccolta “Suspire ‘e miezejuorno”