‘A jatta…

‘A jatta me guarda dint’a ll’uocchie

pe capì chello ca voglio ‘a essa,

po’ me fa fessa striscannese

vicino a coscia mia

comme vulesse dì: - Te voglio bbene,

ma famme capì che vaje truvanno ‘a me?

T’acchiappo ‘o suricillo e nun va bbuono,

si nun l’acchiappo nun va bbuono ‘o stesso.

Io so’ me stessa, songo ‘na jatta

e si me gratto o gnavulo

a te che te ne mporta

comme a quanno pigli’ ‘a porta

e me ne vaco facenno ‘e fatte mie

quanno ‘a natura ‘o vvò ?

Nun songo fatta p’’e cuscine ‘e casa.

Io esco e traso quanno me pare e piace.

Si tu nun si capace e me stà appriesso

zumpanno mure comme facc’io ‘e vvote

nu’  starme a rrote. Tengo sette vite

e torno p’’o murziello  sapurito,

pe tutte ‘e ciance ca me saie fà.

‘A jatta guarda e spera  ca io l’aggio capita

chello ca me so’ ditto

comme si fosse state

essa a dirmelo.

M’’a veco ncopp’o cirmolo

e se fa triste ‘o core quann’essa zompa

speranno ca nun more.

Gioacchino Ruocco

Ostia lido  17.03.016

Nota.

Il tempo è un animale strano. Somiglia a un gatto, fa come gli pare. Ti guarda sornione e indifferente, scappa via quando lo implori di fermarsi e rimane immobile se pure lo preghi, per favore, di andare. A volte ti azzanna mentre fa le fusa, oppure ti raspa con la sua lingua ruvida. Ti graffia mentre ti sta baciando.